DRC: UN irasaba iperereza ku iterabwoba ryo kwicwa rikorerwa Dr Denis Mukwege

Michelle Bachelet, umunyamabanga mukuru w’ishami rishinzwe uburenganzira bwa muntu mu muryango w’abibumbye-ONU, asaba Repubulika Iharanira Demokarasi ya Congo gukora iperereza ku iterabwoba ryo kwicwa rikorerwa Denis Mukwege.

Uyu muganga Mikwege, yahawe ishimwe ry’amahoro ryitiriwe Nobel, avuga ko yahawe amagambo abwirwa ko ashobora kwicwa nyuma y’aho yamaganye iyicwa ry’abantu 18 mu ntara ya Kivu y’Amajyepfo mu kwezi kwa Karindwe gushize k’uyu mwaka wa 2020.

Uyu mugore witwa Bachelet, asaba iperereza ryigenga kuri ibi bivugwa ko ari iterabwoba ryo kwicwa bikorerwa uyu muganga Denis Mukwege.

Umukuru w’igihugu cya DRC, Felix Tshisekedi yiyemeje ko Leta izakora iperereza kuri iryo terabwoba kandi yiyemeza kurinda umutekano wa Muganga Mukwege.

Muganga Mukwege nkuko BBC ibitangaza, ni umuhanga mu bijyanye n’ubuzima bw’imyororokere ku bagore (gynécologue), akaba afite ivuriro mu ntara ya Kivu y’Amajyepfo.

Yahawe agasimwe k’Amahoro kitiriwe Nobel mu mwaka wa 2018 mu gikorwa cye cyo kwita kubakorewe ihohoterwa rishingiye ku gitsina mu gihe cy’intambara muri iki gihugu.

Photo/France 24

Munyaneza Theogene / intyoza.com

Umwanditsi

Learn More →