Yoweri Kaguta Museveni, Perezida w’Igihugu cya Uganda, kuri uyu wa 01 Kamena 2020 yatangaje ko igihugu ayoboye kizahomba Miliyari imwe na Miliyoni magana atandatu y’amadolari ya Amerika babonekaga avuye mu bukerarugendo. Ibi ngo ni ingaruka z’icyorezo cya Coronavirus. Ubukerarugendo ni hamwe mu hantu hinjiriza iki gihugu akayabo k’Amadolari.

Ba mukerarugendo, baza mu Gihugu cya Uganda kureba inyamaswa z’ubwoko butandukanye harimo nk’Intare, giraffe, imbogo hamwe n’izindi nyamaswa zitandukanye.

Hari kandi ba Mukerarugendo bandi baza kureba inguge nini zitwa, “Gorilles”mu rurimi rw’igifransa cyangwa se Ingagi(mu Kinyarwanda) mw’ishamba/Pariki riri mu majyepfo ashyira uburengerazuba bw’iki gihugu. Ni ku rubibe na Repubulika Iharanira Demokarasi ya Congo n’u Rwanda.

Igihugu cya Uganda, nkuko ijwi rya Amerika ribitangaza, cyabonye Miliyari 2 y’Amadolari ya Amerika kiyakuye mu bukerarugendo mu mwaka w’i 2017. Iki gihugu kandi cyari kinjije Miliyari imwe na Miliyoni magana arindwi mu mwaka w’imbere yaho.

Ikigega mpuzamakungu FMI cyatangaje mu kwezi gushize kwa Gicurasi 2020 ko byari byitezwe ko amafaranga Uganda ikura mu bukerarugendo agabanuka ibice 54 kw’ijana hagati y’umwaka w’i 2019 n’umwaka w’i 2020.

Munyaneza Theogene / intyoza.com