Arabia Saoudite: Yishwe anyozwe azizwa ibyaha yakoze akiri umwana

Umugabo wo muri Arabia Saoudite yishwe anyonzwe ku byaha abaharanira uburenganzira bwa muntu bavuga ko yakoze agifite imyaka 17, nubwo iki gihugu cyari cyatangaje ko cyakuyeho igihano cy’urupfu ku bana.

Mustafa Hashem al-Darwish yahagaritswe mu 2015 ashinjwa ibyaha bijyanye n’imyigaragambyo. Abategetsi ba Arabia Saoudite bavuga ko yahamwe n’icyaha cyo gushinga umutwe w’iterabwoba no kugerageza guteza imyigaragambyo akoresheje ibirwanisho.

Ariko abaharanira uburenganzira bwa muntu bari basabye ko inyongwa rye rihagarikwa, bakavuga ko yarenganijwe.

Ishyirahamwe Amnesty International hamwe na Reprieve, ishyirahamwe rirwanya igihano cyo gupfa, bavuga ko Darwish w’imyaka 26 yari yahakanye ibyo yemeye, bikavugwa ko yari yabyemeye abanje kuborezwa igufa.

Abategetsi ba Arabia Saoudite ntacyo baratangaza ku mugaragaro ku byerekeye ibi birego.

Nk’uko bivugwa n’ibiro ntaramakuru Reuters, mu byaha Darwish yashinjwe harimo “gushaka guhungabanya umutekano” no “guteza indyane/imidugararo”.
Mu byemezo ku byo ashinjwa harimo isanamu-video” yibasira abashinzwe umutekano” hamwe n’uruhare yagize mu “myigaragambyo” irenga 10 mu 2011 na 2012.

Minisitiri w’umutekano mu Gihugu muri Arabia Saoudite, avuga ko al-Darwish yagerageje no kugandagura/kwica abashinzwe umutekano, nk’uko bivugwa n’ikinyamakuru cyegamiye kuri Leta.

Hagati aho, inzandiko z’urukiko ntizerekana neza itariki n’imwe yaba yarakoreyeho ibyo byaha, nk’uko Reuters ibivuga.

Ishyirahamwe Reprieve rivuga ko umuryango wa al-Darwish utigeze umenyeshwa iby’iri nyongwa, ko wabimenyeye ku mbuga nkoranyambaga.

Itangazo ry’umuryango we ryasohowe na Reprieve rivuga riti: “Ni gute wanyonga umwana kubera isanamu-video iri muri terefone yiwe? Kuva ahagaritswe, ntitwigeze tumenya na kimwe uretse umubabaro. Ni umubabaro udashobora guhera mu muryango wose”.

Asubirwamo n’ibiro ntaramakuru SPA, minisitiri w’umutekano mu gihugu wa Arabia Saoudite avuga ko al-Darwish yanyongewe i Dammam, umujyi ukungahaye kuri Peterori.

Mu mwaka ushize, abategetsi ba Arabia Saoudite batangaje ko bahagaritse inyongwa ry’abantu bakoze ibyaha bakiri bato, ko ahubwo bazahanishwa igifungo cy’imyaka itarenga icumi.

Hagati aho, Reprieve ivuga ko Arabia Saoudite mu mezi atandatu ya mbere y’uyu mwaka wa 2021 imaze kunyonga abantu bangana n’abanyonzwe mu mwaka wose wa 2020.

Munyaneza Theogene / intyoza.com