Covid-19: Intara 5 za Kenya zirimo n’Umurwa mukuru Nairobi byashyizwe mu kato
Perezida Uhuru Kenyatta wa Kenya yahagaritse ingendo ziva n’izijya mu ntara eshanu, zirimo n’umurwa mukuru Nairobi, kubera ubwiyongere bwa Covid-19.
Intara za Kajiado, Kiambu, Machakos, Nakuru na Nairobi zatangajwe nk’ahantu higanje cyane iyi virusi.
Perezida Kenyatta yavuze ko ubu abantu nibura barindwi bapfa buri munsi bishwe na Covid-19, kandi ko batandatu mu bantu 10 bapima bayibasangamo.
Inama zose n’ibikorwa byose bihuza abantu muri izo ntara birabujijwe, gusa abashyingura bemerewe kutarenga 50 naho ubukwe ntiburenze abantu 30.
Ingendo mpuzamahanga zirakomeza ariko abagenzi bakabanza kwerekana icyangombwa ko badafite Covid-19. Abakozi ba leta n’abigenga nabo bategetswe gukorera mu ngo zabo kugeza hatanzwe amabwiriza mashya.
Atangaza izo ngamba nshya, Perezida Kenyatta yavuze ko amasaha umukwabu wa nijoro utangirira avanywe saa yine agashyirwa saa mbili z’ijoro kugeza saa kumi za mugitondo muri izo ntara.
Ubucuruzi bw’inzoga muri izo ntara bwahagaritswe na za restaurant zategetswe kujya zishyira amafunguro abantu aho bari.
Igipimo cy’ubwandu bwa Covid-19 muri Kenya cyavuye kuri 2 kugera kuri 22% hagati y’ukwezi kwa mbere n’uku kwezi kwa gatatu. Izo ngamba nshya nkuko BBC ibitangaza, zatangiye kubahirizwa guhera I saa sita z’ijoro ry’uyu wa Gatandatu.
Perezida Kenyatta nawe kuri uyu wa Gatanu, yahise aterwa urukingo rwa Covid-19, anategeka abagize guverinoma nabo kurufata bagatanga urugero.
Munyaneza Theogene / intyoza.com