Félix Tshisekedi yatangajwe by’agateganyo ko ariwe watsinze amatora ya Kongo

Nyuma y’amatora y’umukuru w’igihugu muri Kongo-DRC yo kuwa 30 Ukuboza 2018, Komisiyo yigenga ishinzwe iby’amatora-CENI kuri uyu wa kane tariki 10 Mutarama 2019 yatangaje ko Tshisekedi utavuga rumwe n’ubutegetsi ariwe watsinze by’agateganyo amatora n’amajwi 38,57%.

Ahagana ku I saa kumi z’igitondo cyo kuri uyu wa kane tariki 10 Mutarama 2019 nibwo Komisiyo y’amatora yigenga muri Kongo Kinshasa-CENI yatangaje ko Félix Antoine Tshisekedi Tshilombo utavuga rumwe n’ubutegetsi ariwe watsinze mu buryo bw’agateganyo amatora y’umukuru w’Igihugu yabaye kuwa 30 Ukuboza 2018.

Félix Antoine Tshisekedi Tshilombo, ni umuyobozi w’ishyaka UDPS( Union pour la Démocratie et le progrès Social) ritavuga rumwe n’ubutegetsi muri Repubulika iharanira Demokarasi ya Kongo.

Nkuko Radio Okapi dukesha iyi nkuru ibitangaza, mu majwi y’agateganyo yatangajwe na CENI, Tshisekedi niwe uri imbere ya batatu bari bahanganye cyane. Yagize amajwi 38,57% by’amajwi y’agateganyo( miliyoni zisaga 7 z’abamutoye), mu gihe Matin Fayulu ari ku mwanya wa 2 n’amajwi 35,2% (amajwi asaga Miliyoni 6 y’abamutoye) naho Emmanuel Ramazani Chadary afite amajwi 23,8% (miliyoni zisaga 4 z’abantu bamutoye) by’amajwi y’agateganyo.

Komisiyo yigenga ishinzwe amatora muri iki Gihugu cya Kongo-CENI, itangaza ko itangazwa ry’ibyavuye mu matora y’umukuru w’igihugu ku buryo bwa burundu riteganijwe tariki 15 Mutarama 2019 n’urukiko rurinda itegeko nshinga ( Cour constitutionnelle) mu gihe irahira ry’uzaba yatsinze amatora riteganijwe tariki 18 Mutarama 2019.

Perezida Joseph Kabila usanzwe ariwe Perezida wa Kongo, amaze ku butegetsi imyaka 18. Tshisekedi ashoboye kwegukana iyi ntsinzi yaba ari amateka akomeye yanditse muri kongo kuko kuva yabona ubwigenge nta matora yabaye ngo atsindwe n’umuntu utavuga rumwe n’ubutegetsi. Yaba kandi ari intsinzi ikomeye agezeho kuko na se umubyara Etienne Tshisekedi yahanganye kenshi n’ubutegetsi ashaka impinduka ariko biranga.

Munyaneza Theogene / intyoza.com

Umwanditsi

Learn More →