Ihirikwa ry’Ubutegetsi/Coup d’Etat yaburijwemo muri Sudani

Mu gitondo cyo kuri uyu wa Kabiri muri Sudani, haburijwemo umugambi w’abashakaga guhirika ubutegetsi-Coup d’Etat, nkuko bitangazwa n’igitangazamakuru cya Leta y’iki Gihugu. Iki kinyamakuru kigira kiti:” Habayeho kugerageza guhirika ubutegetsi, abanyagihugu basabwa guhaguruka bakayirwanya”.

Umuvugizi wa Leta Mohamed Al Faki Suleiman avuga ko abakekwa muri iki gikorwa bategerezwa kubazwa. Amakuru ava muri Sudani avuga ko abashatse gutembagaza ubu butegetsi bagerageje kwifatira ibibanza bikuru bikuru, harimwo iradiyo, ariko bagateshwa.

Amashusho yakwirakwijwe ku mbuga nkoranyambaga nkuko BBC ibitangza, avugwa ko ari ayo ku murwa mukuru Khartoum, yerekana abasirikare bari mu bimodoka by’intambara/burende mu mihanda, bamwe bereka imodoka inzira zigomba kunyura.

Umutegetsi wo mu nama nkuru iyoboye igihugu yabwiye ibiro ntaramakuru Reuters ko bamaze gugusubiza ibintu mu buryo. Hari imigumuko/imyigaragambyo muri Khartoum, bikaba byari byitezwe ko kuri uyu wa kabiri haba imyigaragambyo, igisirikare kikaba cyahageze kugira ngo gikomeze umutekano.

Sudani, ubu isanzwe iyobowe na Minisitiri w’Intebe Abdalla Hamdok, aho ahagarariye Leta y’inzibacyuho yashinzwe nyuma y’aho ubutegetsi bwa Omar al-Bashir buhiritswe mu kwa kane kwa 2019.

Bashir yahiritswe nyuma y’imyigaragambyo yari imaze amezi atari make yo kumwamagana, ubu akaba akiri imbere y’urukiko ku ruhare rwe muri coup d’Etat yamugejeje ku butegetsi mu 1989.

Abdalla Hamdok uyoboye Leta y’inzibacyuho ya Sudani mu masezerano yo gusangira ubutegetsi yagezweho nyuma y’ihirikwa rya Omar al-Bashir mu 2019.

Iyi myigaragambyo yatangiye hamaganwa izamurwa ry’ibiciro by’umugati n’ibikomoka kuri Peterori, ikaba yaraje kuvamo iyo kwamagana uyu mukuru w’igihugu, abagore n’urubyiruko bakaba barayigizemo uruhare rudasanzwe.

Munyaneza Theogene / intyoza.com

Leave a Reply

Your email address will not be published. Required fields are marked *