Minisitiri w’Intebe Abiy Ahmed yemeje ko ingabo za Eritrea zigiye kuva muri Tigray

Minisitiri w’intebe wa Ethiopia Abiy Ahmed yatangaje ko Eritrea yemeye gucyura ingabo zayo izivana mu karere ka Tigray. Ibi bibaye nyuma y’ibitero by’izi ngabo muri Tigray byamaganywe cyane n’amahanga, ariko leta ya Addis Ababa n’iya Asmara byabanje guhakana.

Mu ntangiriro z’iki cyumweru nibwo Abiy Ahmed yemeye bwa mbere ko ingabo za Eritrea zambutse umupaka, nyuma y’amezi abihakana. Yabwiye abagize inteko ishingamategeko ko izo ngabo zinjiye muri Tigray zitinya ko abarwanyi baho batera Eritrea.

Mu itangazo yasohoye kuri uyu wa gatanu nkuko BBC ibitangaza, Abiy Ahmed yavuze ko ibiganiro na Perezida Isaias Afwerki wa Eritrea bumvikanye ko; “Ingabo za Ethiopia arizo zihita zirinda akarere k’umupaka uwo mwanya“.

Rivuga kandi ko Ethiopia na Eritrea “bizakomeza ubufatanye bw’ibihugu n’imishinga y’ubukungu”.

Ingabo za Eritrea n’iza Ethiopia zishinjwa ibikorwa by’ubwicanyi, gufata abagore ku ngufu n’iyicarubozo ku basivili muri Tigray aho zivuga ko ziri mu bikorwa byo kurwanya abagumutse ku butegetsi.

Abarwanyi b’ishyaka TPLF rifite imizi muri Tigray, ubu bagamije ubwigenge bw’intara ya Tigray, bamaze igihe mu mirwano ya hato na hato n’izo ngabo. Mu mpera z’umwaka ushize, leta ya Addis Ababa yatangije intambara yo “gusubiza ku murongo” Tigray, ishinja ishyaka TPLF gushaka kuvana iyo ntara ku gihugu.

Abiy Ahmed na Isaias Afwerki bishimira gufungura ambasade ya Eritrea i Addis Ababa mu kwa karindwi 2018

Eritrea na Ethiopia ni ibihugu byarebanaga ay’ingwe mu gihe cy’imyaka irenga 50, aho myinshi muri yo ishyaka TPLF ari ryo ryari ku butegetsi muri Ethiopia. Nyuma yo kujya ku butegetsi, Abiy Ahmed yagiye yigizayo abo mu ishyaka rya TPLF batumvikanye nawe. Yasubiranyije umubano wa Eritrea na Ethiopia, anabiherwa igihembo cy’amahoro cyitiriwe Nobel mu 2019.

Munyaneza Theogene / intyoza.com

Leave a Reply

Your email address will not be published. Required fields are marked *