Muramvya: Imodoka zitwara abagenzi zaratwitswe, benshi bicwa barashwe, abandi barakomereka

Imodoka 2 zitwara abagenzi, imwe yo mu bwoko bwa Toyota Hiace, indi ya Toyota Probox zaguye mu gitero cy’abitwaje intwaro mu ijoro ryo kuwa 26 Kamena 2021 ahagana ku i saa mbiri z’ijoro. Haravugwa abasaga 15 bishwe barashwe, abandi babarirwa mu icumi barakomereka i Muramvya.

Abatangabuhamya mu baganiriye n’ikinyamakuru iwacu cy’i Burundi, bavuga ko hari benshi bapfiriye muri iki gitero, abandi barakomereka, imodoka ziratwikwa ndetse humvikana urufaya rw’amasasu.

Minisiteri y’umutekano mu Gihugu, ibinyujije ku rubuga rwayo yatangaje ko iki gitero ari icy’iterabwoba, cyatwikiwemo imodoka zitwara abantu, gipfiramo abantu iyi Minisiteri itatangajwe umubare n’abandi bakomeretse, aho cyakorewe ku musozi wa Munanira ku muhanda muri Komini Rutegama ku bilometero 3 uva Muramvya werekaza i Gitega, mu murwa mukuru wa Politiki w’u Burundi. Polisi y’iki Gihugu ivuga ko iperereza rikomeje gukorwa.

Ku bantu barokotse iki gitero, bavuga ko abantu bitwaje intwaro barashe ku modoka ubwo bamwe mu bagenzi bageragezaga gukura amabuye yari yafungishijwe uyu muhanda. Bavuga ko abapfiriye muri iki gitero barenga 15 abandi babarirwa 10 barakomereka, aho bahakuwe bajyanwa ku bitaro bya Muramvya na Kibimba.

Iki gitero cyabaye, kije gikurikiye ikindi cyaherukaga gukorwa Tariki 9 Gicurasi 2021 n’abantu bitwaje intwaro batamenyekanye muri iyi ntara nubundi ya Muramvya, aho cyaguyemo abantu cumi abandi benshi bagikomerekeramo.

Munyaneza Theogene / intyoza.com