RwandAir yahagaritse ingendo zerekeza Uganda

Kompanyi y’indege ya Leta y’u Rwanda( RwandAir), ivuga ko yabaye ihagaritse ingendo z’indege zerekeza i Entebbe muri Uganda guhera kuri uyu wa kane kubera kwiyongera kw’icyorezo cya Covid-19 muri iki Gihugu cy’igituranyi.

Kuri uyu wa kane, Leta ya Uganda yatangaje ko yagize umubare munini kurusha iyindi minsi ku bantu banduye iki cyorezo, aho habonetse abanduye bashya 1,438 mu gihe cy’umunsi umwe mu bipimo byafashwe kuwa kabiri.

Kompanyi ikora ingendo zo mu kirere-Rwandair, niyo ya mbere muri aka karere yafashe icyemezo cyo guhagarika ingendo z’indege zijya muri Uganda kubera ubu bwiyongere bushya bwa Covid-19 muri icyo gihugu nkuko BBC yabitangaje.

Abategetsi ku ruhande rwa Uganda nta cyo batangaje ku cyemezo cya Rwandair.
Uganda ihanganye n’amoko ya Covid yabonetse bwa mbere mu Buhinde, mu Bwongereza, Africa y’Epfo kongeraho isanzwe yabonetse bwa mbere mu Bushinwa.

Hari impungenge ko niba ubwandu bukomeje kwiyongera, ibigo by’ubuvuzi bishobora kubura ibikoresho n’umwuka wa ‘oxygen’ uhabwa abarwayi.

Uganda imaze kugira abanduye bose hamwe 56,949. Perezida Yoweri Museveni aherutse gutangaza amategeko ya ‘guma mu rugo’ yatumye amashuri n’ingendo zihuza uturere bihagarikwa.

Kuwa kane Emira Zunze Ubumwe z’Abarabu zatangaje ko mu rwego rwo kwirinda iki cyorezo abagenzi bava mu bihugu bya Uganda, Zambia na DR Congo guhera uyu munsi kuwa gatanu batemerewe kwinjira muri icyo gihugu.

Munyaneza Theogene / intyoza.com

Leave a Reply

Your email address will not be published. Required fields are marked *