Tanzania: Perezida Magufuri yavuye ku izima yemera ko Coronavirus iri mu gihugu

Perezida John Pombe Magufuli wa Tanzania yavuze ko Leta akuriye nta muntu yabujije kwambara agapfukamunwa. Ni nyuma y’amasengesho y’iminsi 3 basabaga Imana kubakiza iki cyorezo kitemerwaga ko kiri mu gihugu.

Yabivugiye mu kiliziya kuri iki cyumweru mu murwa mukuru w’ubucuruzi Dar es Salaam, aho yagiriye abantu inama yo kwambara udupfukamunwa dukorerwa mu gihugu kuko ari twiza kurusha utuva hanze.

Ibi yavuze byumvikanye nko guhindura imvugo kwa Leta ye ku cyorezo cya coronavirus muri Tanzania.

Abwira abaje gusenga, Magufuli yabasabye gukomeza gufata ingamba zo kwirinda ikwirakwira rya Covid-19 nk’uko umunyamakuru wa BBC i Dar es Salaam abivuga.

Yabashishikarije kandi gukomeza gukoresha uburyo gakondo bwo kwirinda no kwivura nko kwiyuka ibimera (steaming).

Hashize iminsi muri Tanzania havugwa impfu z’abantu barimo n’abari hafi ya Magufuli ubwe, gusa ntibyemejwe ku mugaragaro ko bishwe na Covid-19.

Mu kwezi gushize, kiliziya yavuze ko misa z’abapfuye ziyongereye muri icyo gihe, gusa ntiyavuze impamvu yabyo.

Hagati aho, ishami ry’umuryango w’abibumbye rishinzwe ubuzima ku isi, OMS/WHO, ryasabye Leta ya Tanzania gushishikariza abantu kwirinda Covid-19 no kwitegura kubakingira.

Mu butumwa yatanze mu cyumweru gishize, umukuru wa OMS Tedros Adhanom yagaragaje impungenge z’uko hari abatanzania bajya mu bihugu bituranyi n’ahandi bakabasangamo Covid-19.

Kuri iki cyumweru nkuko BBC ikomeza ibivuga, wari umunsi wa nyuma w’amasengesho no kwiyiriza byasabwe na Perezida Magufuli ngo Imana ibakize Covid-19.

Hagati mu mwaka ushize, nabwo Magufuli yasabye iminsi itatu y’amasengesho mu gihugu, nyuma yayo gato avuga ko coronavirus yashize muri iki gihugu.

Munyaneza Theogene / intyoza.com