Umunyamabanga nshingwabikorwa w’akagari ka Nkingo, ari mu maboko ya Polisi aho akekwaho kuba yarariye itanura ry’amatafari rya Polisi.

Karake Francois Xavier, umunyamabanga nshingwabikorwa w’akagari ka Nkingo umurenge wa gacurabwenge afungiye kuri sitasiyo ya polisi ya Runda aho akekwaho kugurisha itanura ry’amatafari ahiye rya Polisi.

Itanura uyu Karake bivugwa ko yariye ngo ni itanura ry’amatafari ahiye polisi yabumbishije igira ngo ibashe kubona amatafari yo kwiyubakira ibiro byayo.

Ubwo ikinyamakuru intyoza.com cyavuganaga n’umuvugizi wa Polisi mu ntara y’amajyepfo CIP Hakizimana Andre, yahamije ko amakuru yifungwa ry’uyu mugitifu wa Nkingo ari impamo.

CIP Hakizimana, avuga ko uyu Karake akurikiranyweho Kunyereza umutungo w’ikigo kigengwa na Leta (Polisi), akomeza avuga ko amatafari uyu Karake yagurishije atari aye ko ahubwo yari aya Polisi.

Itanura Gitifu Karake akurikiranyweho ngo ryubatswe mu kagari ka Kabagesera mu murenge wa Runda, imyaka ishize isaga ine aho benshi bibaza uburyo iki gihe cyose cyashize n’icyo polisi yakoraga.

intyoza.com