USA: Umwirabura yishwe arashwe na Polisi bati “ni impanuka”, Perezida Biden asaba iperereza

Umwirabura Daunte Wright w’imyaka 20 y’amavuko kuri uyu wa 11 Mata 2021 yarashwe n’umupolisi aramwica. Umukuru wa Polisi yatangaje ko kuraswa kwa Daunte mu mujyi wa Brooklyn Center muri Leta ya Minnesota kwabaye impanuka. Mama ubyara Daunte arashavuye cyane, ati ” yari ubuzima bwanjye…”.

Chief Tim Gannon, umukuru wa Polisi yabwiye abanyamakuru ko uwarashe uyu Daunte agapfa ngo yari aziko akoresheje intwaro yitwa “Taser” ariko aribeshya avanayo imbunda nyayo. Iyi Taser, ni intwaro irekura ingufu nk’iz’amashanyarazi zigaca intege umuntu mu gihe runaka.

Byaje gutangazwa ko uyu mupolisi warashe Daunte yitwa Kim Potter, yakoreye Polisi ya Brooklyn Center kuva mu myaka 26 ishize. Urupfu Daunte Write rwateje imyigaragambyo yatumye bahita batangaza umukwabu.

Kuri uyu wa mbere nijoro nkuko BBC ibitangaza, abantu benshi barenze kuri uwo mukwabu bajya kwigaragambya imbere y’ibiro bikuru bya polisi ya Brooklyn Center. Ababibonye bavuga ko bamwe bateraga ibintu byaka umuriro n’amacupa ku bapolisi nabo bakabasubiza bakoresheje ibyuka biryana mu maso.

Umwuka ni mubi kurushaho hafi y’aho mu mujyi wa Minneapolis aho urubanza rwa Derek Chauvin wahoze ari umupolisi rukomeje, aho uyu nawe ashinjwa kwica umwirabura George Floyd.

Mu ijoro rigira kabiri abantu bongeye guteranira imbere ya Brooklyn Center Police Department bigaragambya.

Daunte Wright yahagaritswe ku cyumweru ashinjwa kurenga ku mategeko yo mu muhanda, habaye gushyamirana ubwo yashakaga gusubira mu modoka ye.

Mu kiganiro n’abanyamakuru kuwa mbere mu gitondo, Chief Gannon yerekanye video ngufi ya camera yo ku myambaro y’abapolisi, yerekana Wright ari kwinjira mu modoka ye umupolisi nawe ariho amwambika amapingu iruhande rw’umuhanda.

Nyuma undi mupolisi yumvikana avuga ngo “Taser, Taser, Taser” – uburyo busanzwe bukoreshwa na polisi. Wright aboneka ageze mu modoka akagenda, mu gihe umupolisi yumvikana avuga ngo “ndamurashe“. Kuko yari yakomeretse cyane, Wright ageze imbere gato yahise agonga aragwa.

Katie, nyina wa Daunte Wright’s mother, yavuze ko umuhungu we yamuhamagaye ubwo yari ahagaritswe na polisi.

Chief Gannon ati: “Mbona ko umupolisi yari azi ko azanyeTaser‘ ye ariko amurasa isasu rimwe. Ntacyo navuga cyakoroshya umubabaro”. Uyu mupolisi yahise ashyirwa mu kiruhuko.

Muri icyo kiganiro n’abanyamakuru, Mike Elliott ukuriye umujyi wa Brooklyn Center yavuze ko akora ibiri mu bushobozi bwe bwose ngo “Daunte Wright abone ubutabera”.

Ati: “Ubu imitima yacu irababaye, turi mu gahinda muri aka kanya. Ibi ntibyari bikwiye kuba muri iki gihe kibi. Ibi bibaye mu gihe abantu bose, Amerika yose, mu by’ukuri isi yose iri kureba”.

Abigaragambya barakaye, baririmbaga izina rya Daunte Wright bahise bigabiza imihanda inkuru ikimara kumenyaka ku cyumweru nijoro. Amaduka agera kuri 20 yarasahuwe ndetse ibikorwa byo gusahura byagukira no mu mujyi wa Minneapolis uri hafi, nk’uko ikinyamakuru StarTribune kibivuga.

Perezida wa Leta zunze ubumwe za Amerika, Joe Biden nkuko VOA ibitangaza, kuri uyu wa mbere yavuze ko nta busobanuro buhari ku bikorwa byo gusahura amangazini/Amaduka ndetse n’imidugararo/imyigaragambyo yadutse ku kigo cy’ubucuruzi, Brooklyn Center, kiri mu nkengero z’umujyi wa Minneapolis muri Leta ya Minnesota.

Perezida Biden asaba amahoro n’umutekano nkuko ababyeyi b’uyu mwirabura wishwe, Daunte Wright, nabo basaba.

Umugore wigaragambya ari gucyocyorana n’umupolisi.

Igipolisi cyo muri ako gace ka Brooklyn cyavuze ko abapolisi bahagaritse uwo musore, nyuma bagasanga hari hasanzwe ho urwandiko rwo kumufata kuko atunze inkoho/imbunda atabifitiye uruhushya.

Igihe Polisi yageragezaga kumufata, yahise yikubita mu modoka arahunga, nyuma ahita araswa. Hagati aho, Abategetsi bavuga ko muri iyi midugararo yadutse, umuntu umwe yishwe arashwe abandi barimo umupolisi barakomereka ku kigo cy’ishuri ryisubuye mu mujyi wa Knoxville.

Umuryango wa Daunte Wright uvuga iki?

Katie, nyina wa Wright, kuri uyu wa mbere nijoro yavuze ko umutima we “wacitsemo ibice igihumbi…”, ati: “Ndamukumbuye cyane“. Yongeraho ati: “Yari ubuzima bwanjye, yari umuhungu wanjye, simbasha kubyakira. Ngo habaye kwibeshya? ngo ni impanuka?”. Mbere, yari yavuze uburyo umuhungu we yamuhamagaye ubwo bari bamuhagaritse.

Yamubwiye ko ari ukubera “udukoresho tumanitse ku kirahure gituma utwaye imodoka abona inyuma”. Avuga ko nyuma yumvise telephone icitse. Ati: “Hashize umunota umwe, narahamagaye umukobwa w’inshuti ye yari atwaye mu modoka aba ari we witaba, ambwira ko bamurashe…ko umuhungu wanjye aryamye aho nta buzima”.

Munyaneza Theogene / intyoza.com