Nancy Pelosi, ukuriye inteko ishinga amategeko umutwe w’Abadepite muri Amerika, yatanze itegeko ryo kwambara agapfukamunwa kuri buri wese mu bagize iyi nteko n’abakozi bose b’inteko. Yavuze ko utazakurikiza iri tegeko azakurwa mu bagize icyumba cy’inteko. Ni mu gihe abamaze gupfa bazira icyorezo cya Covid-19 barenga ibihumbi 150.
Pelosi, yafashe uyu mwanzuro nyuma y’uko Louie Gohmert, umudepite wa leta ya Texas wo mu barepubulikani wakunze kuboneka kenshi aho inteko ikorera nta gapfukamunwa yambaye, ubu bamusanzemo Covid-19.
Madame Pelosi ni iki yategetse?
Madamu Pelosi uhagarariye leta ya California wo mu bademokarate, ejo ku wa gatatu tariki 29 Nyakanga 2020 nijoro (muri Amerika) yavuze ko abadepite bazemererwa gusa kuvanamo agapfukamunwa igihe bari kugeza ijambo ku nteko.
Yagize ati: “Ukuriye inteko yizeye ko buri wese no mu bakozi azakurikiza ibi nko kubaha ubuzima no kwirinda, ndetse no kurinda abandi bose bari muri iyi nzu no hafi yayo“.
Madamu Pelosi yavuze ko” kunanirwa kwambara agapfukamunwa bizafatwa nko kurenga ku mabwiriza bikomeye“, aburira ko ushinzwe umutekano ashobora gusohora uwayarenzeho.
Urubuga GovTrack.us ruvuga ko abadepite 10 ba Amerika, batatu b’abademokarate na barindwi b’abarepubulikani, bamaze kubasangamo coronavirus.
Louise Gohmert yavuze iki?
Uyu mugabo w’imyaka 66, basanze yaranduye Covid-19 ubwo yari apimwe nk’uko bikorwa buri gihe ku biro bya perezida wa Amerika bitewe n’uko ejo ku wa gatatu byari biteganyijwe ko ajyana i Texas na Perezida Trump.
Bwana Gohmert yahise asubira ku biro bye kubimenyesha bagenzi be, ibitangazamakuru byo muri Amerika bivuga ko yasubiyeyo yambaye agapfukamunwa.
Yanatanze ikiganiro aho yavuze ko akeka ko n’agapfukamunwa ke kaba ariko kamwanduje. Gusa ni umwe mu badepite b’abarepubulikani wakunze kuboneka ku nyubako y’inteko atambaye agapfukamunwa.
Ku wa kabiri, tariki 28 Nyakanga 2020, BBC itangaza ko Bwana Gohmert yavanyemo inshuro nyinshi aka gakoresho mu nteko yateranye amasaha agera kuri atanu iri kumva umucamanza mukuru wa Amerika William Barr.
Ifoto iboneka kuri Twitter yerekana abagabo babiri bamwegereye nabo nta n’umwe ukambaye. Ibiro bishinzwe ubutabera muri Amerika bivuga ko kubera iyo mpamvu, Bwana Barr nawe agiye gusuzumwa.
Muri Amerika, nubwo ku ikubitiro ry’iki cyorezo habayeho impaka ku gapfukamunwa, abahanga mu buzima ubu bemeza ko gupfuka ibice iyi virus yanduriramo bigabanya ibyago byo kuyandura no kuyikwiza.
Munyaneza Theogene / intyoza.com
