Perezida Donald Trump wa Leta Zunze Ubumwe za Amerika akomeje kwamagana amatora y’umukuru w’Igihugu hakoreshejwe uburyo bw’iposita, avuga ko bushobora gutuma igihugu “cyiha amenyo y’abasetsi”. Ni mu gihe aya matora ateganijwe mu kwezi k’Ugushyingo 2020.
Perezida Trump, ibi abivuze mu gihe ishyirahamwe rishinzwe amaposita muri Amerika (USPS) rimenyesha ko amakarita y’itora ashobora kutahagerera igihe. Umubare w’abashaka gutora utari bwigere uboneka, bategereje gutora bakoresheje ubwo buryo bw’iposita bitewe n’icyorezo cya coronavirus.
Umuyobozi w’ ishyirahamwe rishinzwe amaposita usanzwe ari soma mbike/umuntu wa hafi cyane wa Perezida Donald Trump aranengwa ko agenda gahoro mu gukora. Abo mu ishyaka ry’aba Démocrates, barimo n’uwahoze ayoboye iki gihugu, Barack Obama, bashinja Perezida Trump ko arwanya uburyo bw’iposita ku mpamvu yo “gutesha agaciro amatora”.
Perezida Trump yakomeje avuga ko gutora hakoreshejwe uburyo bw’iposita bishobora gutuma amatora abamo ubujura ku nyungu za Joe Biden w’umu Démocrate basanzwe bahanganye. Hagati aho, abahanga bavuga ko ubwo buryo bwo gutora hakoreshejwe iposita, na Trump we ubwiwe asanzwe akoresha, nta nenge bufite.
Nancy Pelosi umukuru w’inteko nshingamategeko arimo kureba uburyo yahamagaza inama hakiri kare kugira ngo barebere hamwe impinduka zakozwe mu rwego rw’amaposita n’ingaruka zishobora kugira ku matora ategekanijwe ku wa 03 z’ukwa cumi na Kumwe, nk’uko bivugwa n’ibiro ntaramakuru by’abongereza Reuters.
Hari intara nkeya zimaze kumenyesha kugeza ubu ko zizatora zikoresheje uburyo bw’iposita, ibi bikavuga ko abatora bazohererezwa ikarita y’itora mbere y’uko amatora aba, kandi zimwe muri izo ntara zabiteguye mbere y’iki cyorezo.
None Perezida Trump ni iki avuga neza neza?
Mu kiganiro yaraye agiranye n’abamenyeshamakuru ku mugoroba w’ejo ku wa gatandatu tariki 15 Kanama 2020, Perezida Trump yavuze ko nta ngorane afite ku bijyanye no gutora umuntu atarinze kugera ubwe ku biryo by’itora, kuko nawe niko abigenza.
Ariko yongeyeho ati: “Amatora aciye mu buryo bw’iposita azadukoza isoni, azatuma igihugu cyiha amenyo y’abasetsi ku kw’isi”. Akomeza ati: “Ingorane ya mbere ni uko utazigera umenya igihe amatora azarangirira“.
Avuga kandi ko bishobora gufata amezi cyangwa se imyaka kugira ngo ibizava mu matora yo mu kwa cumi na kumwe bimenyekane kuko ku bw’iwe, “amakarita y’itora azatakara, kandi ayo azaba agiye“.
Trump, yabwiye ikinyamakuru Fox News ko yahagaritse amafaranga agenewe urwego rw’amaposita rusanzwe ruri mu ngorane z’ubushobozi, kubera adashyigikiye aya matora hakoreshejwe uburyo bw’iposita.
Ashinja abo mu Ishyaka ry’aba Démocrates basanzwe ari abakeba ko aribo ntandaro yo kudashyika ku masezerano mu rwego rwo guha amafaranga urwego rw’ama posita.
Ati: “Ubu rero bakeneye ayo mafaranga ngo iposita ishobore gukora kugira ngo ishobore gushyikana aya mamiliyoni n’amamiliyoni y’amakarita y’itora. Ubu rero, nimba badashatse ko tugira amasezerano, aya mafaranga ntayo barimo barabona, byumvikane ko nta by’amatora hakoreshejwe uburyo bw’iposita bazigera babona”.
Abo mu ishyaka ry’aba Démocrates banenga bikomeye Perezida Trump kuri iki kibazo cy’iposita, bakabona ko ari uburyo bwo gushaka kwiba amatora. Muri bo nkuko BBC ibitangaza, harimo Nancy Pelosi na Chuck Schumer b’aba Démocrates mu nteko nshingamategeko, bombi bashinja Perezida Trump ko arimo ategura “amayeri yo gutoba amatora“.
Mu minsi ishize, Perezida Trump yasabye ko amatora yigizwa inyuma kugeza igihe icyorezo cya coronavirus giturije kugira ngo abantu bashobore gutora nta ngorane, ibi bikaba byaramaganiwe kure.
Munyaneza Theogene / intyoza.com
