Perezida w’Igihugu cya Kenya, Uhuru Kenyatta yatangaje ko byamunaniye kwihanganira umuhungu we wataye nyirakuru akigira mukabyiniro arenze ku mabwiriza ya“ Guma mu rugo” yafashwe hagamijwe kwirinda icyorezo cya Coronavirus.

Umwe mu bahungu babiri ba Perezida Kenyatta atashatse kuvuga amazina, yarenze ku mabwiriza ya“ Guma mu rugo” yigira mu kirori n’ijoro mu mujyi wa Mombasa, ahantu hafatwa nk’intandaro y’ikwirakwizwa rya Coronavirus muri iki Gihugu.

Perezida Kenyatta yagize ati“ Namubajije nti ko uri kumwe na Nyogokuru wawe arengeje imyaka 80, ukaba warenze kuri ayo mategeko, nk’ubu hagize ikimubaho, uzamererwa ute mu mutima”. Muri iki gihugu, amakoraniro y’abantu benshi arabujijwe.

BBC dukesha iyi nkuru, ivuga ko mu kiganiro n’umunyamakuru wa televiziyo NTV yo muri Kenya, Perezida Kenyatta yibukije ko nta muntu n’umwe ari hejuru y’amategeko yashyizweho mu rwego rwo guhagarika ikwirakwira rya coronavirus.

Hagati aho, Perezida Kenyatta yanenzwe kuba atarahise afata icyemezo cyo gushyira umuhungu we (mukato) muri kimwe mu bigo byagenewe abakekwa ko banduye coronavirus nk’uko bimeze ku bandi banyagihugu ba Kenya iyo bafashwe barenze kuri gahunda ya “Guma mu rugo”.

Perezida Uhuru Kenyatta, avuga ko yarakariye cyane uyu muhungu we, kubona yarataye mu ngorane ubuzima bwa nyinakuru we witwa Ngina Kenyatta ( uyu yavutse kuwa 24 Kamena 1933, imyaka hafi 87 y’amavuko).

Munyaneza Theogene / intyoza.com