Karim Keita, umuhungu wa Perezida Ibrahim Boubakar Keita uyoboye igihugu cya Mali, yavuye mu ku mwanya w’ubudepite mu nteko ishinga amategeko nyuma y’igitutu cy’abigaragambya banenga ibyavuye mu matora y’intumwa za rubanda aheruka, ariko kandi bakanasaba se kwegura ku mwanya w’umukuru w’Igihugu.

Umuhungu wa Perezida Ibrahim Boubacar Keita, yeguye ku mwanya we w’umukuru wa komisiyo ishinzwe ibibazo by’umutekano mu nteko Ishingamategeko kuri uyu wa mbere tariki 13 Nyakanga 2020.

Karim Keita, yahisemo kwegura mu gihe Leta iri ku gitutu cy’imyigaragambyo idasiba, yamagana ibyavuye mu matora y’intumwa za rubanda yo mu kwezi kwa gatatu n’ukwa kane uyu mwaka wa 2020.

Ariko kandi, uretse kuba abakora iyi myigaragambyo banenga ibyavuye muri ayo matora y’intumwa za rubanda, ijwi rya Amerika dukesha iyi nkuru ryanditse ko bananenga uburyo Leta yitwara mu kibazo cy’imitwe y’intagondwa ihungabanya umutekano w’igihugu. Bavuga kandi ko bababajwe n’uko iyi Leta irangwa no kurya Ruswa.

Imyigaragambyo ikorwa n’abatavuga rumwe na Leta, yarakomeje mu mpera z’icyumweru gishize ndetse no kuri uyu wa mbere tariki 13 Nyakanga 2020 abayitabiriye basabye ko Perezida Ibrahim Boubakar Keita yegura ku mwanya w’umukuru w’Igihugu.

Igitutu cy’abigaragambya kandi, giherutse gutuma kuwa 11 Nyakanga 2020 Perezida Ibrahim Boubakar Keita asesa urukiko rw’itegeko Nshinga. Ibi yabikoze mu rwego rwo kugerageza guhosha imyigaragambyo y’abakomeje kwibasira ubutegetsi bwe.

Soma hano inkuru bijyanye: Perezida wa Mali yokejwe igitutu n’abigaragambya asesa urukiko rw’Itegeko Nshinga

Munyaneza Theogene / intyoza.com