Umunyapolitiki utavuga rumwe na Leta y’Uburusiya Alexei Navalny, nyuma yo kwitabwaho n’abaganga aho yari arwariye mu gihugu cy’Ubudage, agiye gusubira mu gihugu cye nkuko byatangajwe n’umuvugizi we.

Anyuze ku rubuga rwe rwa Twitter, Kira Yarmysh yanditse ati: “Ni ibintu bintangaza igituma hari ababa biyumvira ukundi”.

Ku ruhande rwe, Bwana Navalny nawe yerekanye ishusho/video ye ku rubuga rwa Instagram, ubwa mbere kuva ahawe uburozi, avuga ko ahumeka neza atarinze gufashwa n’ibyuma.

Ubuzima bwe bwageze kure ndetse hafi no gupfa kuko yageze no muri Koma nyuma y’aho ubwo yari mu ndege ava mu karere ka Siberia ku wa 20 z’ukwezi kwa Munani uyu mwaka wa 202 byavuzwe ko yahawe uburozi bwo mu bwoko bwa Novichok, aho yahise yihutanwa mu bitaro Charité byo mu mujyi wa Berlin mu Budage.

Abasanzwe bakorana na Alexei, bavuga ko yahawe ubwo burozi ku itegeko rya Perezida w’Uburusiya, Vladimir Putin, ibyamaganiwe kure n’ibiro bye bivuga ko Uburusiya nta ruhare rubifitemo.

Umugore Yarmysh umuvugizi wa Navalny ati: “Umwanya wose mu gitondo cy’uno munsi Abanyamakuru bakomeje bambaza ngo ‘nibyo koko ko Alexie ategura gusubira mu Burusiya’? Nsubiye kubimenyesha buri wese: nta yindi nzira yigeze yiyumvirwa”.

Iri tangazo ryaje haciye akanya gato Bwana Navalny yanditse ubutumwa bwiwe kuri Instagram. Yanditse ati: “Ndabaramutsa, uyu ni Navalny. Ndabakumbuye cyane. N’ubu nta kintu kinini kirahinduka, ariko ejo nashoboye guhumeka njyenyine umunsi wose. Nta kintu nifashishije, byaranshimishije cyane”.

Hanze y’ibitaro arimo kuvurirwamo, hari abapolisi bakeya, nk’uko bivugwa n’umunyamakuru wa BBC wari uhari. Avuga ko ku bwinjiriro hari abapolisi babiri bafite imbunda, hamwe n’imodoka y’igipolisi ihamaze igihe.

Hari amakuru atangazwa n’ibinyamakuru by’ubudage ariko ataremezwa neza, avuga ko hanze y’icyumba arwariyemo haba hari imirongo y’abapolisi, kandi ko n’igitanda cye ngo cyaba gicungiwe umutekano.

Hagati aho, nkuko BBC ibitangaza, Uburusiya bwanze umubonano hagati ya Bwana Navalny na Bwana Putin, mu gihe uyu munyapolitike utavuga rumwe n’ubutegetsi bwe yaramuka akize. Ibiro ntaramakuru bya Interfax bisubiramo amagambo y’umuvugizi w’ibiro by’umukuru w’igihugu Dmitry Peskov avuga ati: “Ntitubona akamaro k’uwo mubonano, rero nizeye ko umubonano nk’uwo utazabaho”.
Munyaneza Theogene / intyoza.com