Ababikira n’Abapadiri basaga 80 barapfuye muri Tanzania mu mezi abiri, haracyekwa Covid-19

Ababikira 60 n’Abapadiri 25 barapfuye muri Tanzania mu mezi abiri ashize. Ni nyuma yo kwerekana ibimenyetso bya coronavírus, nk’uko byatangajwe na Kiliziya Gatolika muri iki gihugu.

Iyo Kiliziya, yari isanzwe ikunze kuvuga cyane ku byerekeye icyo cyorezo mu gihugu kiri muri bike ku isi bidashyira ahagaragara amakuru ajyanye nacyo, yaburiye abanyaTanzania kubahiriza cyane ingamba zo kucyirinda..

Prezida Magufuli ntiyemera ko icyo cyorezo giteye ikibazo muri iki gihugu, yanze no gufata ingamba zo kukirwanya, mu kwezi gushize nabwo Minisitiri w’Ubuzima yavuze ko Leta nta migambi ifite yo gutanga Inkingo.

Ariko Padiri Charles Kitima, umunyamabanga w’inama y’abepiskopi muri Tanzania (TEC) – ihuriro ry’abepiskopi Gatolika, yavuze ko Covid-19 ari ukuri muri Tanzania, ko ihari.
Mu kiganiro n’Abanyamakuru I Dar es Salaam, yavuze ati “Umwe umwe wese muri twebwe asabwa gufata ingamba zikenewe kugira ngo twikingire kandi dukingire n’abandi, na cyane cyane abageze mu zabukuru n’abasanganywe izindi ndwara,”.

Yavuze ko adashobora kwemeza ko aba Bihayimana bishwe na Covid-19 kuko batapimwe, n’ubwo berekanye ibimenyetso byose by’iyo ndwara birimo “ingorane zo guhumeka”.

Padiri Kitima ati: “Abantu ntibapimwa. Iyo ni ingorane ikomeye. Kiliziya ifite amavuriro ashyika 500 mu gihugu ariko ntitwemerewe gupima kandi nta bikoresho dufite byo kubikora”.

Yavuze ko Kiliziya yabonye ko imvugo y’abategetsi muri Leta yahindutse ku byerekeye ingamba zo kwirinda Covid-19, ariko avuga ko abantu batari bake batubahiriza izo ngamba kuko nta bihano biteganijwe ku bazirengako.

Bubaye ubwa kabiri Kiliziya Gatolika ishyira ijwi hejuru ku bijyanye n’ukugeramirwa/guhangayikishwa n’icyorezo cya coronavirus mu gihugu, ivuga ko mu kwezi kwa mbere yari yabonye ukwiyongera kw’abapfa mu ma paruwase yayo.

Tanzania nta Mibare ijyanye na Covid-19 iratanga kuva mu kwezi kwa gatanu mu mwaka ushize.
Ishami ry’umuryango w’Abibumbye ryita ku buzima-OMS, nkuko BBC ibitangaza rimaze gusaba kenshi iki gihugu kubikora, no guhindura aho gihagaze ku Nkingo ubu zirimo zirakwiragizwa binyuze mu mugambi wa Covax.

Munyaneza Theogene / intyoza.com