Covid-19: Muri Amerika, abafashe Doze zose z’urukingo bashobora guhura nta gapfukamunwa

Ikigo cy’Amerika cyo kurwanya no kwirinda indwara (CDC) cyatangaje ko Abanyamerika bakingiwe byuzuye bashobora gusubira mu gisa n’ubuzima busanzwe.

Abatewe inkingo zisabwa bashobora kujya gusura bagenzi babo na bo bakingiwe ndetse na bamwe batakingiwe, nkuko amabwiriza mashya y’iki kigo abivuga.

Ikigo CDC cyavuze ko bifatwa ko abantu bafite ubwirinzi bwa ngombwa iyo hashize ibyumweru bibiri bamaze guhabwa doze ya nyuma y’urukingo.

Kugeza ubu ,abaturage b’Amerika barenga miliyoni 30 bamaze gukingirwa Covid-19.
Abategetsi bo mu rwego rw’ubuzima batangaje aya mabwiriza mashya kuri uyu wa mbere ubwo bari mu kiganiro cy’itsinda ryo mu biro bya Perezida bya White House rishinzwe guhangana n’iki cyorezo.

Ayo mabwiriza avuga ko Abanyamerika bakingiwe byuzuye bashobora:
• Guhurira mu nzu n’abandi bantu bakingiwe bisesuye batambaye udupfukamunwa kandi badahana intera
• Guhurira mu nzu n’abantu batakingiwe bo mu rugo rumwe, mu gihe bari mu bafite ibyago biri hasi byo kwibasirwa bikomeye na coronavirus
• Kureka gupimwa cyangwa kujya mu kato mu gihe bagize aho bahurira n’ufite Covid-19, keretse gusa ari uko bagaragaje ibimenyetso.

Andy Slavitt, umujyanama mukuru, yabwiye abanyamakuru ati:” Twatangiye gutanga ishusho y’uko isi isa mu gihe twerekeza mu kuva muri Covid-19. Uko abantu barushaho gukingirwa…urutonde rw’ibikorwa ruzakomeza kwiyongera”.

Abamaze gukingirwa baracyasabwa gukurikiza amabwiriza y’ibanze y’ubwirinzi, nko kwambara udupfukamunwa no guhana intera ahahurirwa n’abantu benshi ndetse no kwirinda kujya ahari abantu benshi n’ingendo.

Amabwiriza anasaba kwambara udupfukamunwa no guhana intera iyo bari kumwe n’abadakingiwe kandi bashobora kuba bafite ibyago biri hejuru byo kuzahazwa n’ingaruka zivuye kuri Covid-19.

Mu gihe cya vuba aha gishize nkuko BBC ibitangaza, Amerika yagize ukwiyongera k’umubare w’abakingirwa ku munsi. Inkingo zirenga miliyoni 90 zimaze gutangwa kugeza ubu.

Kwemezwa k’urukingo rwa gatatu rwa Johnston & Johnston rutangwa inshuro imwe, nako kwafashije mu kongera umubare w’inkingo. Ariko abategetsi bo mu rwego rw’ubuzima banaburiye ko Covid-19 igihangayikishije cyane.

Muri Amerika abantu barenga miliyoni 29 batangajwe ko banduye coronavirus, muri bo abarenga 525,000 yarabishe, nkuko imibare yegeranyijwe na Kaminuza ya Johns Hopkins ibigaragaza.

Nyuma yaho ku munsi w’ejo ku wa mbere, ibiro bya White House byatangaje ko Perezida Joe Biden azageza ijambo ku baturage b’Amerika ku wa kane rijyanye n’umwaka umwe ushize hatangiye ingamba za guma mu rugo kubera Covid-19.

Mu cyumweru gishize, Perezida Biden yavuze ko bitarenze mu mpera y’ukwezi kwa gatanu Amerika izaba ifite inkingo zihagije za coronavirus zo gukingira buri muntu ugeze mu cyiciro cy’ubukure.

Munyaneza Theogene / intyoza.com