Malawi: Inkingo hafi ibihumbi 20 za AstraZeneca zatwitswe

Leta ya Malawi yatwitse inkingo 19,610 za AstraZeneca zarangije igihe. Nicyo gihugu cya mbere ku mugabane wa Afurika kibikoze.

Mu gutwika izi nkingo, Malawi yakurikije inama zatanzwe n’ikigo cya Afurika gishinzwe  kugenzura indwara ‘Africa Centres for Disease Control’ (Africa CDC) cyemeje ko inkingo zarengeje igihe ziba zitagikora.

Binyuze kuri Twitter, hashyizwe amafoto rw’izo nkingo zirimo gutwikwa mu bitaro byo ku murwa mukuru Lilongwe. Bavuga ko izo nkingo zarengeje igihe kandi ko ntacyerekana na kimwe ko zakomeza gukoreshwa, hashingiwe ku ngingo ngenderwaho z’ishami ry’umuryango w’Abibumbye-ONU ryita ku buzima ku isi-WHO/OMS.

Malawi nkuko BBC ibitangaza, kibaye igihugu cya mbere ku mugabane wa Afrika gitwitse ku mugaragaro inking zarangije igihe. Abategetsi, bavuga ko iyo ngingo igamije gutanga icyizere kubanye Malawi kugira ngo bazahabwe inkingo igihe zizaba zibonetse.

Kugeza ubu, imibare y’abikingiza Covid-19 iracyari hasi cyane, ahanini bitewe n’ibihuha bivugwa kuri izi nkingo. Abategetsi batinya ko gukoresha inking zarangije igihe byatuma abantu babatakariza icyizere.

Leta ya Malawi ifite icyizere ko ukwikingiza kw’abaturage bayo kuziyongera mu gihe bazabona izindi nkingo z’umugambi wa Covax. Abanye Malawi barenga 330.000 barikingije.

Munyaneza Theogene / intyoza.com