Uruganda rwa AstraZeneca rwarezwe mu nkiko kubwo gutindana inkingo

Umuryango w’Ubumwe bw’Uburayi (EU/UE) watanze ikirego mu rukiko urega uruganda rwa AstraZeneca rukora inkingo za coronavirus. Rurashinjwa

Akanama k’Uburayi, ishami ry’ubutegetsi rya EU, kavuze ko kareze AstraZeneca kubera kutubahiriza ibyo iyi kompanyi yiyemeje muri kontaro yo kugeza urukingo muri EU, no kutagira gahunda “yizewe” yo gutuma inkingo zihagera ku gihe.

Uruganda rwa AstraZeneca rwavuze ko icyo kirego “nta shingiro gifite“. Rwavuze ko “ruziregura bikomeye mu rukiko”.

Icyo kirego kigejeje ku yindi ntambwe ubushyamirane bumaze igihe hagati y’impande zombi ku bijyanye no gutanga inkingo za coronavirus.

Hari bamwe mu muryango wa EU bavuze ko uruganda rwa AstraZeneca (ruhuriweho n’Ubwongereza na Suède/Sweden) rubogamiye ku Bwongereza – ariko rwo rwarabihakanye.

Hagati aho nkuko BBC ibitangaza, Amerika yatangaje ko izasaranganya n’ibihugu by’amahanga doze miliyoni 60 z’urukingo rwa AstraZeneca uko zizagenda ziboneka. Izo nkingo zizoherezwa mu mezi ari imbere, nyuma yo kugenzurwa ubuziranenge n’ikigo cya leta, nkuko bitangazwa n’ibiro ntaramakuru AP.

Amerika ifite umurundo w’urwo rukingo, nubwo abagenzuzi b’ubuziranenge bw’imiti batararwemeza ko rwakoreshwa ku baturage bayo. Hari bamwe bamaze igihe banenga iki gihugu kwigwizaho inkingo, mu gihe ibindi bihugu bizicyeneye cyane.

Munyaneza Theogene / intyoza.com