Mu Gihugu cy’u Burundi, Abagabo babiri hamwe n’umwana w’umuhungu w’Imyaka 10 bishwe barashwe mu ijoro ryo kuri uyu wa gatandatu ariko abakoze ubwicanyi nta wamenyekanye.
Ku mugoroba wo kuri uyu wa Gatandatu tariki ya 14 Mutarama 2017, abantu batatu barimo abagabo babiri n’umwana umwe w’umuhungu w’imyaka 10 bishwe barashwe n’abantu kugeza ubu bivugwako bataramenyekana.
Aba bishwe uko ari batatu aribo; Vincent Nshimirimana, Serge Mpawenimana hamwe na Oscar Nsengiyumva n’umwana w’umuhungu w’imyaka 10, bishwe aharenga i saa mbiri z’ijoro. Bategewe mu mayira abiri ahitwa Jimbi ku mutumba wa kavumu muri zone Muyira ya komine Kanyosha.
Uwari umugore wa Nyakwigendera Nshimirimana, yatangaje ko kuri we kugeza ubu abona atazi uburyo agiye kubaho n’umwana muto umugabo we amusigiye. Imiryango ya banyakwigendera kugeza ubu iribaza icyo ababo barashwe bazize?
Abanyakavumu basaba ubutegetsi ko gukura cyangwa kwambura intwaro abantu bazitunze batabifitiye uburenganzira byakomeza kuko ngo bigaragara ko zigihari nyinshi mu banyagihugu.
Umukuru wa Zone Muyira avuga ko iperereza kuri ubu bwicanyi ryatangiye ndetse agasaba abo ayoboye kuba maso ariko kandi bakanatungira agatoki inzego zibishinzwe ku kintu cyose babona gishobora kuba cyahungabanya umutekano.
Abantu batandatu bahagaritswe n’umukomiseri w’igipolisi mu ntara ya Bujumbura kuri iki cyumweru ku mpamvu z’iperereza ku bijyanye n’uru rupfu rw’abantu batatu.imiryango y’abahagaritswe yo ivuga ko boba bahagaritswe kubera ari abayoboke ba Agathon Rwasa.
Ijwi ry’Amerika dukesha iyi nkuru, ryashatse umuvugizi w’igipolisi cy’u Burundi ngo agire icyo avuga kuri ubu bwicanyi ndetse n’ifatwa ry’aba bantu batawe muri yombi ku bw’iperereza ariko ntabwo ryabashije ku mubona.
Kuva uyu mwaka wa 2017 watangira, abantu batanu bishwe barashwe muri komine ya Kanyosha y’intara ya Bujumbura. Babiri biciwe muri zone Kiyenzi ku mutumba Musugi mw’ijoro ry’itariki ya mbere kuno kwezi kwa mbere turimwo.
Kanda hano ujye ubona amakuru y’iwacu kandi isaha ku isaha kuri Facebook no kuri twitter
Munyaneza Theogene / intyoza.com
