Polisi y’Igihugu cya Kenya kuri uyu wa 25 Kamena 2020 yarashe ikoresheje imbunda n’amasasu mu kivunge cy’abantu bigaragambyaga bamagana ifatwa ry’umumotari warenze ku mabwiriza ya Leta yo kwirinda icyorezo cya Coronavirus.

Mu itangazo rya Polisi ya Kenya, rivuga ko umuntu wa mbere wapfuye ari umugabo w’imyaka 40 y’amavuko warashwe ubwo abandi batwara taxi moto(abamotari) barwanyaga umupolisi wari ujyanye mugenzi wabo kuri Sitasiyo ya Polisi.

Polisi, ivuga ko abigaragambya bahise buzura kuri iyo Sitasiyo, batwika inzu y’uyikuriye. Barashwemo amasasu menshi hapfa abandi babiri. Iri tangazo kandi nkuko BBC dukesha iyi nkuru ibivuga, rigaragaza ko “umukuru w’igipolisi cya Kenya yategetse ko umupolisi uvugwa mu kurasa abantu kwabaye afatwa agafungwa“.

Nyuma y’ibyabaye, abantu benshi bagaragaje akababaro batewe no gukoresha imbaraga z’umurengera kwa Polisi mu kurwanya abigaragambya bikavamo gupfa kw’abantu batatu.

Kuwa kabiri, umupolisi wundi wa Kenya yarezwe mu rukiko kwica umwana w’imyaka 13 witwa Yasin Moyo, warashwe ari ku ibaraza ry’iwabo Polisi iri kubahiriza amategeko y’umukwabu i Nairobi. Duncan Ndiema uyu mupolisi uregwa yahakanye ibyaha ashinjwa.

Munyaneza Theogene / intyoza.com