Covid-19: Leta y’Ubwongereza yangiye abavuye DR Congo na Tanzania gukandagira ku butaka bwayo

Igihugu cy’Ubwongereza cyatangaje ingingo ibuza abagenzi bose bavuye muri DR Congo na Tanzania kwinjira ku butaka bwayo mu rwego rwo kwirinda icyorezo cya Coronavirus.
Abinyujije kuri Twitter, Minisitiri ushinzwe ubwikorezi mu gihugu cy’ubwongereza Grant Shapps yavuze ko iyi ngingo igamije kwirinda ikwirakwira ry’ubwoko bushya bw’iyi Virus bwo muri Afurika y’Epfo.

Yanditse ati“ Abagenzi bose bavuye muri ibyo bihugu, uretse Abongereza n’abandi bafite uburenganzira bwo kuhatura, ntabwo bazemererwa kwinjira”.

Mu ntangiriro z’uku kwezi kwa Mutarama 2021 abagenzi 11 bavuye mu bihugu byo muri Afurika y’Amajyepfo bangiwe kwinjira mu bwongereza kubera impamvu nk’izi.

Mu gihe muri DR Congo hamaze gutangazwa abantu barenga gato 20,000 banduye icyorezo cya Coronavirus, uko ibintu byifashe muri Tanzania ntabwo bizwi kuko nta mibare Leta itangaza.

Mu kwa Gatandatu k’umwaka ushize, Perezida John Pombe Magufuri yatangaje ko “ Nta Coronavirus iri muri Tanzania” kubera amasengesho y’abaturage. Gusa ishami ry’umuryango w’abibumbye ryita ku buzima-OMS nkuko BBC ibitangaza, ryagiye ritangaza impungenge ritewe n’imigirire ya Leta ya Tanzania kuri iki cyorezo. Ntacyo abategetsi ba DR Congo na Tanzania baratangaza kuri iki cyemezo cya Leta y’Ubwongereza.

Munyaneza Theogene / intyoza.com

Umwanditsi

Learn More →