Abashinjwa urupfu rw’Umwirabura Floyd bagejejwe imbere y’urukiko bahakana ibyo baregwa

Muri Leta zunze ubumwe z’Amerika, abapolisi bane bashinjwa iyicwa ry’Umwirabura George Floyd bitabye umucamanza kuri uyu wa 29 Kamena 2020 mu mujyi wa Minneapolis ho muri leta ya Minnesota, mu burengerazuba bwo hagati bw’igihugu. Bavuze ko batemera ibyaha baregwa.
Umwe muri bo, Umuzungu witwa Derek Chauvin, ashinjwa icyaha cy’ubuhotozi. Ni we watsikamiye Floyd n’ivi ku ijosi ku italiki ya 25 Gicurasi 2020 hafi iminota icyenda, Floyd ari ku mapingu aryamiye inda, kugera anogotse. Bagenzi ba Chauvin batatu bashinjwa ubufatanyacyaha kuko bari aho barebera.

**Umupolisi w’Umuzungu ashinze ivi ku gikanu cya George Floyd.**

Chauvin n’undi umwe muri bagenzi be baburana bafunze. Abandi babiri baburana bari hanze by’agateganyo nyuma yo gutanga ingwate y’amadolari ibihumbi 750. Bazongera kwitaba umucamanza ku italiki ya 11 Nzeli 2020.

Hagati aho, ijwi rya Amerika dukesha iyi nkuru ritangaza ko umucamanza yabwiye ababurana (umushinjacyaha n’ababuranira umuryango wa Floyd) ko urubanza rushobora kuzatangira mu mizi yarwo ku italiki ya munani y’ukwezi kwa gatatu k’umwaka utaha w’2021.

**George Floyd, ubwo yari ashinzwe ivi ku ijosi yakomeje gutakamba abwira abapolisi ko atabasha guhumeka.**

Umucamanza, yabihanangirije ko bagomba guhagarika kuruvugaho mu itangazamakuru. Ati: “Urubanza rubera mu rukiko, ntirubera mu binyamakuru. Nimukomeza, nzarwimurira ahandi.”