Uwahoze ari Perezida wa Amerika, Donald Trump, yasabye kuri uyu wa kabiri abasenateri b’abarepublikani kwitandukanya na Mitch McConnell, umukuru wabo muri Sena. Ni nyuma y’aho uyu musenateri avugiye ko uyu wahoze ari Perezida yagize uruhare mu myigaragambyo kuri Capitol( inzu y’inteko ishinga amategeko).

Donald Trump avuga ko ishyaka ry’abarepublikani ritazasubira kubahwa cyangwa gukomera mu gihe abategetsi nka senateri Mitch McConnell bakiri ku mutwe waryo.

Iki gitero kije nyuma y’aho McConnell avugiye ku musi wa gatandatu w’icyumweru gishize ko naho yatoye yemeza ko Trump ari umwere mu rubanza rwa impeachment, uwo wahoze ari Perezida ngo yagize uruhare mu midugararo yabaye kw’itariki 6 z’ukwezi kwa mbere kuri Capitol ya Amerika.

Trump nkuko ijwi rya Amerika ribitangaza, ashinja McConnell kuba ari we watumye abarepublikani batakaza sena.

Trump yavuze kandi ko azakomeza gukorana n’abanyamugambwe/abakuru b’ishyaka mu gihugu hagati no gushyigikira abakandida b’abarepublikani bamuyoboka, mu matora yo mu kwezi kwa cumi na kumwe 2022.

Munyaneza Theogene / intyoza.com