Indege B-737-800 MAX ya Ethiopian Airlines nyuma y’iminota 6 ihagurutse yerekeza Nairobi yakoze impanuka

Amakuru atangwa n’ubuyobozi bwa Kompanyi y’indege ya Ethiopian Airlines ndetse akanemezwa n’ibiro bya Minisitiri w’intebe w’Igihugu cya Ethiopia, ni ay’uko kuri iki cyumweru tariki 10 Werurwe 2019 indege ya Ethiopian Airlines yahagurutse muri iki gihugu yerekeza Nairobi muri Kenya yakoze impanuka nyuma y’iminota 6 gusa ihagurutse. Yarimo abagenzi 149 n’abakozi bayo 8.

Nk’uko byashyizwe ahagaragara mu itangazo ryasohowe n’ubuyobozi bw’iyi Kampuni ya Ethiopian Airlines aho rinihanganisha imiryango yari ifite abantu babo muri iyi ndege yakoze impanuka hafi y’umujyi wa Bishoftu, nkuko kandi n’itangazo ryasohotse mu biro bya Minisitiri w’intebe w’iki gihugu ribivuga, abantu 157 nibo bari muri iyi ndege.

Mu bantu 157 bari mu ndege, 149 ni abagenzi basanze naho abantu 8 bandi basigaye ni abakozi bo muri iyi ndege. Itangazo ry’iyi Kampuni y’indege rivuga ko ku i saa 8h38 AM ( z’igitondo) ku isaha yabo- Addis Ababa nibwo indege yahagurutse ariko ngo ku i saa 8h44 AM, nyuma y’iminota 6 ihagurutse nibwo itumanaho ryacitse.

Nyuma yo gucika kw’iri tumanaho hahise hatangira igikorwa cyo gushakisha no gutabara ariko magingo aya ntabwo haramenyekana ngo mu bantu 157 bari mu ndege ni bangahe bayiguyemo, abakomeretse cyangwa se abakiri bazima.

Ibiro bya Minisitiri w’intebe wa Ethiopia byasohoye itangazo mu izina rya Guverinoma, rihumuriza kandi ryihanganisha imiryango yose yari ifite abantu muri iyi ndege yakoze impanuka.

Ubuyobozi bwa Ethiopian Airlines butangaza ko amakuru kuri iyi mpanuka buza kugenda buyatangaza uko bishoboka, ariko kandi ngo n’abashaka kuyakurikirana bashobora kunyura ku rubuga rwa www.ethiopinairlines.com bakayabona.

Munyaneza Theogene / intyoza.com