Minisitiri w’Ubuzima mu gihugu cya Zimbabwe yarahagaritswe ku mirimo ndetse arimo gukurikiranwaho ibyaha bifitanye isano na ruswa bikekwa ko yahawe mu gutanga isoko ry’imiti hamwe n’ibikoresho byo gupima icyorezo cya Coronavirus.
Obadiah Moyo, Minisitiri w’ubuzima muri Zimbabwe yahagaritswe kuri uyu wa Gatanu tariki 19 Kamena 2020 nyuma y’aho abatavuga rumwe na Leta n’abakoresha imbuga nkoranyambaga banengeye bikomeye Leta y’iki gihugu.
Bivugwa ko kompanyi yo mu gihugu cya Hongrie(Hongiriya) yaba yarahawe isoko rya Miliyoni 20 z’amadolari ya Amerika bidaciye mu nzira y’ukuri. Leta ntacyo iravuga ku ihagarikwa rya Bwana Moyo.
Obadiah Moyo, nkuko BBC dukesha iyi nkuru ibitangaza, abaye Minisitiri ugira kabiri ushinjwe kurya ruswa muri Leta iyobowe na Perezida w’iki gihugu, Emmerson Mnangagwa.
Bivugwa ko amasezerano n’iyo kompanyi Drax Consult, yari imaze amezi abiri ibayeho, yaba yarabaye ikigo gishinzwe amasoko muri Zimbabwe kitagishijwe inama. Mu cyumweru gishize, umuherwe wo muri iki gihugu Delish Nguwaya uzwi ko ari we uhagarariye Drax Consult muri Zimbabwe, yarahagaritswe ashinjwa kubigiramo uruhare.
Umunyamakuru wa BBC i Harare Shingai Nyoka, avuga ko iyo nkuru yatangiye kumenyekana binyuze ku mbuga nkoranyambaga. Abanyagihugu batangiye kugaragaza amakenga yabo ku buryo umuherwe uzwi cyane mu manyanga/ubutiriganya yashoboye gushinga ikompanyi nshyashya, agahita anahabwa isoko ry’amamiliyoni menshi yo kugura imiti n’ibikoresho bimwe ku biciro bitari ukuri. Ikinyamakuru cya Leta Herald kimenyesha ko amasezerano yose n’iyi kompanyi Drax yahagaritswe.
Zimbabwe yemeza ko abantu bagera kuri 500 ari bo bamaze kwandura icyorezo cya Coronavirus, harimo bane kimaze guhitana, ariko amakuru akavuga ko imibare yaba irenze kure iyi itangazwa. Iki gihugu kandi cyugarijwe n’ibibazo by’ubukungu kuva imyaka itari mike, bikavugwa ko ruswa iza ku isonga.
Munyaneza Theogene / intyoza.com
